එම ව්‍යාපෘතිය සඳහා ජර්මනියේ Marveg සමාගම ඇමරිකානු ඩොලර් මිලියන 1825.8 ක් ද, රුමේනියාවේ IPIP සමාගම ඇමරිකානු ඩොලර් මිලියන 1700ක් ද, ඇමරිකාවේ Vantec සමාගම ඇමරිකානු ඩොලර් මිලියන 1300- 1500 අතර මුදලක්ද, දකුණු කොරියාවේ Keangnam සමාගම ඇමරිකානු ඩොලර් මිලියන 1308 ක් ද මිල ගණන් ඉදිරිපත් කර තිබුණු අතර ඇගයීම් කමිටු වාර්තාව අනුව ජර්මනියේ සමාගමට 69% ක්ද කොරියානු සමාගමට 72% ක් ද රොමේනියානු සමාගමට 75% ක් ද හා ඇමරිකානු සමාගමට 81% ක් ද වශයෙන් ඇගයීම් ලකුණු ලැබී ඇත. ඒ අනුව ඇමරිකානු Vantec සමාගමට ටෙන්ඩරය ලබාදීමට ඇගයීම් කමිටුව නිර්දේශ කර ඇති අතර එය අවසාන මිල ගණන් වශයෙන් ව්‍යාපෘතිය සඳහා ඇමරිකානු ඩොලර් මිලියන 1500 ක් සඳහා පොරොන්දු වී ඇත.

කොන්ත්‍රාත්තු කාලය වශයෙන් අවුරුදු 8 ක කාලයක් සෑම සමාගමක්ම පොරොන්දු වී ඇති අතර ජර්මනියේ Marveg සමාගම එය අවුරුදු 6 කින් නිම කිරීමට ඇස්තමේන්තු ගතකර ඇත.

පසුගියදා ශ්‍රී ලංකාවට සපැමිණි චීන රජයේ ජනාධිපති ෂින් ජින් පින් ගේ සංචාරයෙන් අනතුරුව එකවිටම ජනාධිපති කාර්යාලයෙන් ඛණිජ තෙල් අමාත්‍යංශය වෙත දැනුම් දී ඇත්තේ ටෙන්ඩරයේ පළමු වටයෙන්ම ප්‍රතික්ෂේප වූ චීනයේ Sinopect Engineering සමාගමට අදාළ ටෙන්ඩරය ලබා දෙන ලෙසයි. ඇගයීම් කමිටුවේ වාර්තා පසෙකලමින් මෙම චීන සමාගම මෙම ව්‍යාපෘතිය සඳහා ඇමරිකානු ඩොලර් මිලියන 2200ක් ඇස්තමේන්තු ගත කර ඇති අතර ශ්‍රී ලංකා රජය ඊට එකඟ වී ඇත.

ඒ අනුව අදාළ ටෙන්ඩරය චීනයේ Sinopect Engineering සමාගමට ලබාදීමට අවශ්‍ය ලියකියවිලි සහ කැබිනට් පත්‍රිකා මෙම සතියේ කැබිනට් මණ්ඩලය වෙත ඉදිරිපත් කිරීමට නියමිතය. මෙම චීන සමාගම සම්පූර්ණ ව්‍යාපෘති මුදලෙන් 1% ක කොමිස් මුදලක් ඛණිජ තෙල් අමාත්‍ය අනුර ප්‍රියදර්ශණ යාපා මහතාට ලබාදීමට කැමැත්ත පලකර ඇත.

මෙම කොමිස් මුදල පිළිබඳව ජනාධිපති පුත් නාමල් රාජපක්ෂ මහතාට දැන ගැනීමට ලැබී ඇති අතර ඔහු එයට විරෝධය දක්වා එම සම්පූර්ණ කොමිස් මුදල ඉදිරි ජනාධිපතිවරණයේ ප්‍රචාරක කටයුතු සඳහා ලබාදෙන ලෙසට චීනයේ Sinopect Engineering සමාගමට නියෝග කර ඇත. තමාගේ කොමිස් මුදල අහිමි කිරීම පිළිබඳව අනුර ප්‍රියදර්ශණ යාපා නාමල් රාජපක්ෂ සමග දැඩි කෝපයකින් පසුවේ.

නාමල් රාජපක්ෂ මහතා චීනයේ Sinopect Engineering සමාගමට නියෝග කර ඇත්තේ ලබන දෙසැම්බර් 01 දාට ප්‍රථමව ව්‍යාපෘති මුදලෙන් 10% ක ප්‍රමාණයක් ජනාධිපතිවරණයේ ප්‍රචාරක වියහියදම් සඳහා වහාම ගෙවන ලෙසයි.